Муус устар 27 күнүгэр тапталлаах дойдубут, Сахабыт Сирин төрүттэммит күнэ. Бу өрөгөйдөөх үтүө күн Доллу нэһилиэгэр Социалистическай Үлэ Геройа Тарас Гаврилович Десяткин аатынан Тумул орто оскуолатын иннигэр үөрүүлээх митинг буолан ааста. Митинг сүрүн сыалынан оҕолорго Ийэ дойдуга тапталы иҥэрии, улуу дьоннорбут ааттарын үйэтитии буолар.
Митинг үөрүүлээх аһыллыытыгар «Саха Өрөспүүбүлүкэтин өрөгөй ырыата» ылланна. Оскуола үөрэнээччилэрэ, нэһилиэк ыччаттара, тыыл- үлэ бэтэрээннэрэ, тэрилтэ салайааччылара, үлэһит коллективтар көхтөөхтүк кытыннылар.
Үөрүүлээх чааһы «Доллу нэһилиэгэ» тыа сирин түөлбэтин баһылыга Николай Прокопьевич Сивцев, «Тумул» тыа хаһаайыстыбатын производственнай кооперативын директора Таисия Васильевна Десяткина, Социалистическай Үлэ Геройа Тарас Гаврилович Десяткин аатынан Тумул орто оскуолатын директора Владислав Николаевич Кисиляхов эҕэрдэ тылларынан арыйдылар.
Митинг сүрүн түгэнинэн Тарас Гаврилович Десяткин бюһугар сибэкки дьөрбөтүн уурдулар
Саха Өрөспүүбүлүкэтин күнүнэн итиитик — истиҥник эҕэрдэлиибит! Бука бары дьоллоох доруобай буолуҥ, үөрэххэ, үлэҕэ үрдүк ситиһиилэри баҕарабыт!