Ыам ыйын 9 күнэ. Бу күн хас биирдии киһи сүрэҕэр –дууһатыгар, хаһан да умнуллубат, ытык күн буолан иҥмит. Бүгүн биһиги, фашистскай Германияны кыайбыппыт 81 сылын бэлиэтиибит. Бу күн, дойдубут үрдүнэн үөрүү-көтүү, дьол-соргу дуораһыйбыта.
Улуу кыайыыбыт хааннаах кыргыһыы, ыар хоромньу, элбэх дьон олоҕун толук ууруу түмүгэр кэлбитэ. Биһиги хорсун аҕаларбыт, эһэлэрбит, ийэлэрбит, эбэлэрбит- олохторун, эдэр саастарын харыстаабакка, дойдуларын, кэлэр көлүөнэ эйэлээх олоҕун туһугар бэриниилээхтик сэриилэспиттэрэ. Бу сэриигэ биһиги Саха сирин үтүө уолаттара, кыргыттара бары биир киһи курдук туруммуттара. Кинилэр хорсун быһыылара, дьулуурдара, тулуурдара биһиэхэ мэлдьи үтүө холобур буолар. Билигин биһиги ортобутугар баар үлэ-тыыл бэтэрээннэригэр, сэрии сылын оҕолоругар истиҥ ытыктабылы, махталбытын тиэрдэбит. Эһиги баар буолан, биһиги бу күн эйэлээх халлаан анныгар олоробут! Уһун үйэлээх буолуҥ!
Бу дьоллоох күн ытык кырдьаҕастарбытын, тыыл геройдарын албан ааттарын, үтүө тылынан ахтыаҕыҥ, эйэлээх олох иһин тыыннарын толук уурбут биир дойдулаахтарбыт сырдык мөссүөннэригэр, умнуллубат ааттарыгар сүгүрүйэн, бүгүҥҥү көлүөнэ ыччатыттан, сэрии, тыыл ветераннарын, сэрии сылларын оҕолорун ааттарыттан Аҕа дойду Улуу сэриитин кыттыылаахтарыгар анаммыт Мэҥэ тааска, Албан аат уонна кэриэстэбил гирляндатын уурдулар
Кыргыс хонуутугар хаалбыт биир дойдулаахтарбыт ааттара хаһан да умнуллубат! Кинилэр сырдык мөссүөннэрэ, хорсун быһыылара, биһиги сүрэхпитигэр, өйбүтүгэр үйэ-саас тухары иҥэн сылдьыаҕа. Ким да умнуллубат, туох да умнуллубат!
А5а дойдуну көмүскүүр Улуу сэрии суостаах уотун ортотунан элбэх эрэйи көрөн ааспыт, кыайыы өрөгөйдөөх күнэ үүнэрин төлкөлөспут Доллу сирин хорсун- хоодуот буойуннарыгар өлбөөдүйбэт өйдөбүл, тыыл ветераннарыгар, сэрии сылын оҕолоругар – өрөгөйдөөх Улуу Кыайыы 81 сылынан э5эрдэ буолуохтун!
Бу өйдөбүл күҥҥэ «Доллу нэһилиэгэ» тыа сирин түөлбэтин баһылыга Николай Прокопьевич Сивцев эҕэрдэлээтэ уонна тыыл- үлэ бэтэрээннэригэр, сэрии сылын оҕолоругар бэлэх туттартаата.
«Алгыс» бэтэрээннэр сэбиэттэрин бэрэссэдээтэлэ, Доллу нһилиэгин Бочуоттаах олохтооҕо Иннокентий Васильевич Птицын.
Социалистическай Үлэ Геройа Т.Г. Десяткин аатынан орто оскуола кылаастар икки ардыларыгар ыытыллыбыт «Ырыа уонна стройунан хаамыы» күрэҕин кыайыылаахтара.
Бүгүн Улуу кыайыы 81 сылын ытыктаан туран бэлиэтиибит. Бу күн биһиги күүспүт,биһиги түмсүүбүт өссө күүһүрэр. Дойдубут инники кэскилин туһугар үлэлиэҕиҥ, оҕолорбут, сиэннэрбит дьоллоох буолалларын туһугар дьулуһуоҕуҥ. Саха норуотугар уруй –айхал!
Бар дьоммутугар бука барыгытыгар эйэлээх, ыраас халлааны, сырдык чаҕылхай күнү, үгүс үтүмэн үөрүүлээх күннэри, дойдубутугар эйэлээх олоҕу ис сүрэхтэн баҕарабыт!
