Алтынньы ый бастакы аҥаарыгар үтүө үгэс буолан ыытыллар Аҕам саастаахтарга аналлаах тэрээһин ыытылынна.
Бу дьоро күҥҥэ бэйэ-бэйэлэрин эҕэрдэлэһэн, ирэ-хоро кэпсэтэн, ыллаан –туойан, үҥкүүлээн , үгүс көрдөөх оонньууга кыттыһан , күлэн-үөрэн сынньанан бардылар.
Күһүн аайы баай байанай барахсан абылаҥар ылларбыт нэһилиэкпит күүстээх аҥардара, булчут уолаттара үтүө үгэс оҥостон, күндү дьоммутугар анаан, бырааһынньыктааҕы сандалыга Кус миининэн күндүлээтилэр:
-Свинобоев Василий Васильевич
— Свинобоев Егор Васильевич
— Лукин Юрий Кимович
— Эверстов Владимир Николаевич
— Птицын Иван Иванович
Бу үөрүүлээх күн Доллу нэһилиэгин баһылыга Николай Прокопьевич Сивцев, «Тумул» тыа хаһаайыстыбатын производственнай кооперативын директора Таисия Васильевна Десяткина
үтүө – мааны дьоммутугар , дьоһун ситиһиилэринэн наҕараадалары, үбүлүөйдээх аҕам саастаах дьоммутугар эҕэрдэ суруктары, бэлэхтэри туттартаатылар.
«Куоласчаан» оҕо саад иитиллээччилэрэ, Социалистическай үлэ Геройа Т.Г.Десяткин аатынан оскуола үөрэнээччилэрэ уонна нэһилиэк талааннаах ыччаттара ытык- мааны дьоммутугар музыкальнай эҕэрдэлэрин тириэртилэр.
Алаһа дьиэ тэринэн, аал уоту оттунан үйэ аҥаара бииргэ олорбут, элбэх оҕолонон, иитэн-улаатыннаран дьон оҥортообут, үгүс сиэҥҥэ, хос сиэҥҥэ күндү эбээ-эһээ дэтэр Көмүс сыбаайбалаах ыалларбытын эҕэрдэлээтибит:
- Анна Николаевна , Дмитрий Дмитриевич Слепцовтар дьиэ кэргэттэрин.
- Ксения Егоровна, Михаил Трофимович Птицыннар дьиэ кэргэттэрин.
- Нюргустана Николаевна, Елисей Елисеевич Белолюбскайдар дьиэ кэргэттэрин.
Аҕам саастаах декадаларын чэрчитинэн тэрээһиммитигэр *Мындыр саас көхтөөх уһун үйэлэнии култуурата* бырайыак улуустааҕы бэтэрээннэр сэбиэттэрин десана күндү ыалдьыт буоллулар.
Мэҥэ-Хаҥалас улууһун Бэтэрээннэр Сэбиэттэрин бэрэссэдээтэлигэр Евдокия Саввична Решетникова өр сыл «Алгыс» кырдьаҕастар түмсүүлэрин салайааччытынан үлэлээбит Дмитрий Дмитриевич Слепцовка махтал суругун үөрүүлээх быһыыга туттарда.
«Мындыр саас- уһун үйэлэнии- киһи саамай улахан дьоло» көрсүһүү хаамыытынан психолог санаата, нейробика дьарыга, күргүөмүнэн үҥкүү- флешмоб, толкуй тобуллар өй эрчиллэр оонньууларын тэрийэн ыыттылар.
Күндү дьоммутугар кырдьары билиммэккэ, ыалдьары аахсыбакка, дьон ортотугар сылдьан, хас биирдии күнтэн үчүгэйин эрэ ылан, дьолун эрэ сомсон, үөрэ-көтө сэргэхтик, чэгиэнник сылдьыҥ диэн алгыс үтүөтүн аныыбыт!