Семен Никифорович ЭВЕРСТОВ — Саха республикатын культуратын үтүөлээх үлэһитэ, Российскай Федерация норуотун үөрэ5ириитин туйгуна, тыыл уонна үлэ ветерана, Россия спордун ветерана, 20-с үйэ5э Саха республикатын СПОРД-ун лауреата — 1929 сыллаахха бала5ан ыйын 27 күнүгэр Доллу нэһилиэгэр Никииппэр Махсыымабыс уонна Мааппа Павловна Эверстовтар дьиэ кэргэннэригэр бастакы о5онон төрөөбүтэ. Төрөппүттэрэ эрдэ өлөннөр а5атын эдьиийигэр Власова Анна Максимовна5а иитиллибитэ. Оскуолатаа5ы сыллара А5а дойдуну көмүскүүр Улуу сэрии ыар кэмигэр ааспыта. 1945 сыллаахха Сэмэн Төҥүлү 7 кылаастаах оскуолатын бүтэрэн Дьокуускай куоракка №2 нуемэрдээх оскуола5а үөрэнэ киирбитэ. Тыаттан киирбит о5олор интернакка олорон үөрэммиттэрэ. Иллэҥ кэмҥэ о5о спортивнай оскуолатыгар дьарыктаналлара. Сэмэн ордук гимнастиканан сөбүлээн дьарыктаммыт. Тренерэ Анатолий Михайлович Иванов- маҥнайгы разрядтаах спортсмен, инженер- картограф идэлээх эбит. Кинини кытта тэҥҥэ Т. Десяткин, И. Попов, Ксенофонт Пшенников уо.д.а. дьарыктаммыттар. 1949 сыллаахха Республикатаа5ы физкультура уонна спорт комитета Сэмэн Эверстовы уонна Григорий Сысолятины Москва5а физкультура институтугар үөрэтэ ыыппыт, экзаменнары Дьокуускайга туттарбыттар. 1953 сыллаахха Семен Никифорович Москватаа5ы Иосиф Виссарионович Сталин аатынан Киин физкультура институтун бүтэрэн кэлэн Дьокуускайдаа5ы педагогическай институт физическэй иитиигэ кафедратын ассистенынан үлэтин са5алаабыта. Кафедра 6 үлэһиттээ5э, биир эрэ спортивнай зал баара. Эһиилигэр эдэр үлэһит кафедра сэбиэдиссэйинэн анаммыта. Семен Никифорович үлэтин спортивнай базаны кэҥэтииттэн, кадр боппуруостарын быһаарыытыттан са5алаабыта. Кафедра үрдүк үөрэхтээх специалистарынан сыыйа хааччыллан барбыта. Эдэр ыччаты физкультура5а уонна спортка тардыыга сүрүн төһүү күүһүнэн Саха государственнай университетын аһыллыыта буолбута. 1957с студенческай ,,Юность,, СТАДИОНу тутуу үлэтэ са5аламмыта. Стадион тутуутугар профессордар — преподавателлэр, студеннар бары кыттаннар, а5ыйах кэм иһигэр республика5а биир бастыҥ оҥоһуулаах стадион үлэ5э киирбитэ, бу стадиоҥҥа футболга, чэпчэки атлетика5а, спорт национальнай көрүҥнэригэр күрэхтэһиилэр ыытыллар буолбуттара. Семен Никифорович университет физическэй иитиигэ кафедратын 20 сыл устата салайбыт кэмигэр үрдүк үөрэх кыһатыгар физическэй хамсааһын уонна спорт сайдарыгар бэйэтин кыһамньытын, күүһүн-кыа5ын уурбута. Кини салайар кэмигэр Саха государственнай универстиета спорт араас көрүҥнэригэр үрдүк кылаастаах спортсменнары, Россия, Советскай Союз, Аан дойдутаа5ы таһымнаах күрэхтэһиилэр кыайыылаахтарын иитэн таһаарбыта. 1977сыллаахха Семен Никифоровиьы эдэр ыччат уонна о5о спортивнай оскуолатын (ДЮСШ) директорынан анаабыттара. Кини бу тэрилтэни 10 сыл устата салайбыта. Манна үлэлиир кэмигэр оскуола саҥа дьиэтин туттаран үлэ5э киллэрбитэ. Оскуола уопуттаах педагогтарынан уонна тренердэринэн хааччыллыбыта. Семен Никифорович үлэлиир кэмигэр ГИМНАСТИКА республика5а киэҥ биһирэбили уонна өйөбүлү ылбыта. Магадан, Владивосток, Хабаровскай, Благовещенскай куораттары сэргэ Дальнай Восток үгүс куораттарын икки ардыларыгар «Приз Севера по гимнастике среди ДЮСШ» диэн күрэхтэһиилэр сыл аайы ыытыллар буолбуттара. Бу түмүгэр гимнастика5а маастарыстыба үрдээбитэ, ССРС спордун маастардара иитиллэн тахсыбыттара.
Семен Никифорович өр сыллаах сыралаах үлэтэ үрдүк на5араадаларынан бэлиэтэммитэ. Киниэхэ Саха республикатын культуратын үтүөлээх үлэһитэ, Российскай Федерация норуотун үөрэҕириитин туйгуна, Россия спордун ветерана, 20-с үйэ5э Саха Республикатын спордун ЛАУРЕАТА ааттар иҥэриллибиттэрэ.
Эверстов С.Н. аатынан тустуу күрэҕэр Сахабыт сирин араас улуустарыттан, нэһилиэктэриттэн кэлбит күрэхтэһии кыттыылаахтарын, эдэр кэскиллээх ыччат бөҕөстөрбүтүн уруйдуу-айхаллыы көрүстүбүт:
- Бүлүү улууһун хамаандата.
- Таатта улууһун хамаандата.
- Хаҥалас улууьуттан – Нөмүгү, Дьөппөн нэһилиэктэрин хамаандата.
- Амма улууһуттан Эмис нэһилиэгин хамаандата.
- Уус –Алдан улууһуттан — Бороҕон,Бэйдиҥэ.
- Дьокуускай куорат хамаандалара -5, 3, 25- о5о ыччат успуорт оскуолалара
- Мэҥэ-Хаҥалас улууһуттан: Аллараа бэстээх, Майя, Табаҕа, Матта, Хара,Төҥүлү, Тумул, Павловскай хамаандалара.
Бу күрэхтэһиигэ уопсайа 149 оҕо ыччат кытынна.
Бу үөрүүлээх тэрээһиҥҥэ эҕэрдэ тылы эттилэр: “Доллу нэһилиэгэ” тыа сирин түөлбэтин баһылыга Николай Прокопьевич Сивцев.
Социалистическай Үлэ Геройа Т.Г. Десяткин аатынан Тумуллааҕы орто оскуола директора Владислав Николаевич Кисиляхов.
Арассыыйа Үөрэҕириитин Бочуоттаах үлэһитэ, СӨ Үөрэҕириитин туйгуна, Семен Никифорович Эверстов сиэн быраата Дмитрий Кириллович Титов.
Аллараа-Бэстээхтээҕи Тимир Алексеевич Пинегин аатынан «Парус» спортивнай комплекс, Василий Петрович Уваров аатынан көҥүл тустууга олимпийскай эрэл оскуолатын дириэктэрэ Дьулустаан Иванович Захаров.
Күрэхпит кылаабынай судьуйата, Мэҥэ Хаҥалас улууһун көҥүл тустууга ыстаарсай тириэнньэрэ, Аан дойду кылаастаах успуорт маастара, успуорт бэтэрээнэ Александр Гаврильевич Птицын.
Күрэхтэһии хаамыытын сырдатта нэһилиэккэ успуорду тэрийээччи, В.А. Птицын уонна Н.И. Скрябин аатынан *Кэскил* успуорт саалатын дириэктэрэ-Валентин Васильевич Васильев.
Кыттыбыт кэнчээри ыччаттарбытыгар, тренердэргэ үгүс элбэх ситиһиилэри баҕарабыт!