Доллу нэһилиэгэр сэтинньи 15 күнүгэр СӨ үтүөлээх артыыһа С.Н.Сивцев-Доллу аатынан норуот айымньытын дьиэтигэр үтүө үгэс буолан сыллата ыытыллар үлэни үөһээ тутан, тыа сирин олоҕун уйгутун уһансар үлэһит дьону уруйдуур үөрүүлээх тэрээһин буолла.
Нэһилиэкпит биир тумус туттар улахан тэрилтэтэ ,,Тумул,, тыа хаһаайыстыбатын производственнай кэпэрэтиибэ таһаарыылаах үлэтинэн улууска, Өрөспүүбүлүкэҕэ бастыҥнар кэккэлэригэр сылдьар. ,,Тумул,, ТХПК сүрүн үлэтинэн сиртэн ылыллар үүнүүнү үрдэтэн, ынах- сүөһү иитиитигэр племенной үлэни сайыннаран үгүс үүтү, боруода сүөһүнү үксэтэн, сүөһү иитиититтэн үрдүк дохуоду ылаллар.
1999 сыллаахха бастакы президеммит Михаил Ефимович Николаев анал ыйааҕынан бурдук хаһаайыстыбата тэриллэн таһаарыылаахтык үлэлиир- хамсыыр. Ону таһынан ,,Тумул,, ТХПК нэһилиэк сайдыытыгар, араас улахан тутууларга, тэрээһиннэргэ сүҥкэн көмөнү оҥорор, нэһилиэк культурнай, спортивнай, общественнай олоҕор көхтөөх кытталлар. Хаһаайыстыба күнтэн күн үүнэр- сайдар. Нэһилиэк, улуус, Өрөспүүбүлүкэ тэрээһиннэригэр кыттан үгүс кэккэ ситиһиилэрдээхтэр.
Бу үөрүүлээх тэрээһиҥҥэ үлэни таптыыр- үтүө дьоммутун, уйгуну үксэтэр- чулуу үлэһиттэрбитигэр эҕэрдэ тылы уонна наҕараадалары туттардылар ,,Ил Түмэн,, Судаарыстыбаннай мунньаҕын дьокутаата, сиргэ сыһыаннаһыы, айылҕа ресурсаларын уонна экология сис кэмитиэтин бэрэссэдээтэлэ Андрей Михайлович Находкин уонна Ил Түмэн Судаарыстыбаннай мунньаҕын дьокутаата, Наука, үөрэҕирии, култуура, маассабай иһитиннэрэр сириэстибэлэр уонна уопсастыбаннай тэрилтэлэр дьыалаларын сис кэмитиэтин бэрэссэдээтэли солбуйааччытыгар Захар Николаевич Никитин.
Улууспутугар тыа хаһаайыстыбатын сылынан бу тыын суолталаах салааҕа күннэтэ сыралаһан үлэлии- хамсыы сылдьар тыа сирин туруу үлэһит дьонугар эҕэрдэ тыл этэн наҕараадалары туттарда ,,Мэҥэ- Хаҥалас улууһа,, муниципальнай оройуон баһылыга Дмитрий Иванович Тихонов.
Доллу нэһилиэгэ Тыа сирин түөлбэтин баһылыга Николай Прокопьевич Сивцев Тыа хаһаайыстыбатын үлэһиттэрин эҕэрдэлээтэ уонна СӨ тыатын хаһаайыстыбата сайдыытыгар үтүмэн кылаатын, өр сыллаах үлэтин иһин СӨ Айан- көлө уонна суол иис хаһаайыстыбатын министиэристибэтин Грамотатын Владимир Михайлович Десяткиҥҥа туттарда.
Улууспутугар тыа хаһаайыстыбата сайдыытыгар сүҥкэн кылааттарын иһин наҕараадалары туттарда Мэҥэ- Хаҥалас улууһун тыатын хаһаайыстыбатын салалтатын салайааччыта Иннокентий Егорович Семенов.
бу үөрүүлээх тэрээһиҥҥэ Мэҥэ- Хаҥалас улууһун кылаабынай агранома Василий Николаевич Бурнашов СӨ тыатын хаһаайыстыбата сайдыытыгар кылаатын иһин ,,СӨ сир оҥоруута,, судаарыстыбаннай бүдьүөтүнэй тэрилтэ Грамотатын туттартаата үлэһит бастыҥ дьоммутугар.
Быйылгы сыл 10 ый түмүгүнэн бастыҥ көрдөрүүлээх үлэһиттэригэр эҕэрдэ суругу, сертификаттары туттартаата Арассыыйаҕа, СӨ тыатын хаһаайыстыбатын үтүөлээх үлэһитэ, СӨ бочуоттаах олохтооҕо, ,,Тумул,, ТХПК директора Таисия Васильевна Десяткина.
Бу үөрүүлээх киэһээни ырыанан- тойугунан киэргэттилэр Саха сирин, улууспут талба талааннаах ырыаһыттара: Инна Донская- Дайаана, дьон сэргэ сөбүлээн истэр айылгылаах ырыаһыта Айыллыата Дьырылыат- Виктор Иванов, нэһилиэкпит талааннаах ырыаһыттара Семен Десяткин, Зинаида Толстякова.
Тыа хаһаайыстыбата сайдарын туһугар күннэтэ сыраларын ууран туран үлэлиир тутаах үлэһиттэрбитигэр уонна убаастабыллаах Таисия Васильевнаҕа баҕарабыт үлэҕитигэр үрдүк ситиһиилэри, тус бэйэҕитигэр, дьиэ кэргэттэргитигэр дьоллоох доруобай уһун олоҕу!