
Алтынньы ый 5 күнүгэр Доллу нэһилиэгэр С.Н.Сивцев- Доллу аатынан норуот айымньытын дьиэтигэр киэн туттар биир дойдулаахпыт харбааһыҥҥа Паралимпийскай оонньуулар үрүҥ көмүс призера, Аан дойду 3 төгүллээх чөмпүйүөнэ, Европа 7 төгүллээх чөмпүйүөнэ, Арассыыйа успуордун үтүөлээх маастара Анастасия Алексеевна уонна күн күбэй ийэтэ Людмила Николаевнаны кытта көрсүһүү буолла. Бу алтынньы ый 3-4 күннэригэр Сахабыт сирин килбэйэр киинигэр Дьокуускай куоракка ,,Чолбон,, бассейн уораҕайыгар Анастасия Диодорованы улахан успуортан атаарыы тэрээһинэ, ону тэҥэ харбааһыҥҥа Бүтүн Арассыыйатааҕы ,,Хотугу долгун,, күрэхтэһии ыытылынна. Бу күрэхтэһиигэ Анастасия Алексеевна 50 миэтэрэҕэ көмүс харбааһынын көрдөрдө. Сахабыт сиригэр бастакынан ыытыллыбыт күрэхтэһиигэ араас регионнартан 58 спортсмен кыттыыны ылан, кыайыы өрөгөйүн биллилэр, көрдөрүүлэрин тупсардылар. Бу дьоһун түгэни бэлиэтээн Сахабыт сирин Ил дархан Айсен Николаев көҕүлээһининэн уонна сахабыт сирин Алроса АХ ,,Алмаастаах ааттар,, холбоһуктаах бырайыактарын чэрчитинэн Анастасия Диодорова аата 54.05 караттаах алмаас тааска иҥэриллиннэ.

Бу үөрүүлээх күҥҥэ биир дойдулаахтарбыт Анастасия Алексеевна уонна ийэтэ Людмила Николаевна Дьокуускай куоракка ,,Чолбон,, уораҕайыгар ыытыллыбыт улахан тэрээһини, Бүтүн Арассыыйатааҕы харбааһыҥҥа күрэх хайдах ааспытын, инники былааннарын -соруктарын сырдаттылар.

Сайдар үүнэр кэскиллээх нэһилиэкпитин түмэ тардар , сайдар саҕахтарын салайар, нэһилиэкпит аҕа баһылыга Николай Прокопьевич Сивцев эҕэрдэ тылын этэн, ситиһиилэри баҕарда. Анастасия ийэтигэр Людмила Николаевнаҕа ,,Доллу нэһилиэгэ бочуоттаах олохтооҕо,, знагы туттарда.


Доллу нэһилиэгин ,,Алгыс,, бэтэрээннэр түмсүүлэрин бэрэссээдэтэлэ, Мэҥэ- Хаҥалас улууһун уонна Доллу нэһилиэгин Бочуоттаах олохтооҕо Дмитрий Дмитриевич Слепцов эҕэрдэ тылын, алгыһын анаата.

,,Тумул,, тыа хаһаайыстыбатын производственнай кооперативын биир идэлээхтэрин сойууһун бэрэссэдээтэлэ Саха Өрөспүүбүлүкэтин тыатын хаһаайыстыбатын туйгуна Нина Дмитриевна Иванова эҕэрдэ суругун бэлэҕин туттарда.

СӨ үтүөлээх артыыһа аатынан норуот айымньытын дьиэтин директора Акулина Власова эҕэрдэ суругун, сибэкки дьөрбөтүн туттарда.

Анастасия Диодорова успуорка ситиһиитэ, успуорт диэн кэрэ эйгэҕэ сыһыарбыт бу кини тапталлаах төрөппүттэрин сыралара, кинилэр улахан ситиһиилэрэ буолар. Бу киэһэ үөрүүгэ кыттыһан чугас аймахтара доҕотторо алгыс тылы этэн, бэйэлэрин сэмэй бэлэхтэрин туттардылар.

Кыыспытыгар Анастасия Алексеевнаҕа, Людмила Николаевнаҕа инникигэ үрдүк ситиһиилэри, дьиэ кэргэҥҥэ дьоллоох доруобай олоҕу баҕарабыт!
